Angelieddhi e Tiaulicchi

‘Ia mpena ddurmesciutu
nu ìa mancu chiusi l’uecchi
m’àggiu ìstu circundatu
te Angeliedhi e Tiaulicchi!

Stàu allu nfiernu o a mparaisu?
Me tecia ntra lu sennu!
Misu a nn’anguliedhu tisu
me chiamà lu Patreternu!

Ntra lu fuecu terimpettu
lu temoniu cu la fauce
beddhu e nobile te spiettu
me uardà nu se tìa pace!

Me facìa l’uecchiu rizzu
me mmuscià fimmene beddhe
me nvità cu le ncarizzu
me rreutà le cerveddhe!

Nn’angeliedhu cu lu sguardu
me facia lu surrisu!
Me chiamà te lu largu
“ieni cquai a mparaisu”!

La cchiù beddha te le strei
se chiamà Rosamaria!
Famme tie quidhu ca uei
statte cquai a casa mia!

Serafinu mbestialutu
mise fore lu martiedhu
ni terau allu tiaulicchiu
cauci nculu, capu e cuedhu!

Se ncignàra a lletecare
Tiaulicchi e Serafini
nu sapia cu ci ìa scire
2
li secundi o li primi?

Poi me descetài te lampu
stisu ncoste alla Marietta
e nu fici mancu tiempu
cu me nfilu la maglietta!

Nu ha mai turmutu nudu
e stanotte strolecai!
Ha mbrazzatu lu cuscinu
Mariararosa m’he chiamai!

Te lu sennu ca ìa fattu
nu ni dissi ogne cosa!
Cu lu tiaulu scisi a pattu….
Me stà spetta Mariarosa!